غزوة الصناديق

حدثت في مثل هذا اليوم اكبر اشتغاله في تاريخ مصر الحبيبه حيث توجه ملايين المصريين للادلاء باصواتهم في استفتاء وهمي ضحك به المجلس العسكري علي الشعب طيب القلب وتم تقسيم هذا الشعب المسكين بين فريقين ،فريق نعم وفريق لا،وهب آنذاك ائمة المساجد وشيوخ السلطان يضحكون علي البسطاء والجهلاء والفقراء من الشعب ويصورون لهم ان من قال نعم فقد نصر الاسلام والمسلمين وتمادي بعضهم في تصويرها وكانها غزوه من غزوات الاسلام ويجب علينا الانتصار فيها وان من قال لا فقد عصي الله ورسوله وسوف يحق عليه عذاب جهنم وبئس المصير !!
ودشن المجلس العسكري حربا اعلامية شعواء علي كل مؤيدين "لا" وصور "نعم" وكأنها جنة الله في الارض وانها سوف تجلب الامان والاستقرار وسوف تؤدي الي دوران عجلة الانتاج - اللي احنا بندور عليها بقالنا سنه تقريبا - بسرعة الضوء واقنعوا الناس ان "الاشيه هتبقي معدن " وان الناس هتعيش ملوك بعد "نعم"وبالفعل هب الناس ليصوتوا في الاستفتاء وهم يعتقدون انهم يسخرون من مبارك بعدما خلعوه وانهم يخطون اولي خطواتهم نحو الديمقراطيه التي حددها لهم سلفا المجلس العسكري "مجلس مبارك المخلوع" واستفتي الناس علي ٨ مواد ،وقالت الصناديق للاستفتاء نععععععم وقالت مصر للاشتغالات نعععععععم ايضا،حيث فوجئنا باعلان دستوري من المجلس العسكري يحتوي علي ٦٣ ماده لم يستفتي عليهم الشعب اصلا "يعني كأن بالبلدي المجلس العسكري مضي الشعب علي بياض وحط اللي يعجبه بقي بعد كدا" وحتي بعد مارضينا بالغلب وبال ٦٣ ماده اللي ماستفتيناش عليهم اصلا،الغلب مارضاش بينا وانطلق الخبراء العسكريين في جميع القنوات يروجون لفكرة ان "نعم" التي كانت في الصناديق كانت نعم لشرعية المجلس العسكري !!!
وبعد الحرب النفسيه التي خاضها الشعب بين نعم ولا وبعد استنزافه فكريا ومعنويا وبعد شغل الناس والهائهم بقضيه وهميه اصلا هيا "نعم" ولا " لا" طل علينا اللواء ممدوح شاهين بجملته الخالده وهي :سواء النتيجه كانت نعم او لا كنا برضه هنعمل اعلان دستوري!!!!! هههههههههه واي كلام بقي ولا حد فاهم اي حاجه في اي حاجه
قولنا طب خلاص نستني بقي الاستقرار اللي هيجي بقي طالما خسرنا كل حاجه تانيه!! وحتي دي طلعت اونطه ولا الاستقرار جه ولا الامن اتحقق وحصلت يدوب كام مدبحه علي كام مجزره ومات كام ميت واحد علي كام الف واحد اتصابوا علي ١٢ او ١٣ الف اتحاكموا ظلم في محاكم عسكريه وتم تعرية بنات مصر في الشوارع وانتهاك اعراض بنات ااخريات بكشوف العذريه المشينه !! كل دا حصل بعد ماصوتوا ب "نعم" بتاعة الاستقرار"؟؟ ايوا والله العظيم الكلام دا حصل والله علي ما اقول شهيد ..اومال لو كنتوا صوتوا ب "لا" بتاعة الخراب كان هيحصل ايه"؟؟ كان هيجيلكوا تسونامي زي بتاع اليابان !! يا سيدي الفاضل اليابان اتسوت بالارض واتبنت في شهر واحنا عملنا حتة ثوره وحسسوسنا اننا انضربنا بالنووي ومش هتقوملنا قومه تاني.
الدروس المستفاده من خدعة الاستفتاء :
١- المجلس العسكري لا يقول الحقيقه وهو في الواقع من يقود الثوره المضاده لاجهاض ثورة ٢٥ يناير .
٢-الاخوان والسلفيين يتلاعبون بالدين ويستغلونه لمصالحهم فقط ولا يوجد عندهم اي اعتبارات اخري غير مصالحهم بدليل وجودهم في البرلمان منذ اكتر من شهرين ولم يتم تحقيق اي هدف من اهداف الثوره  التي مكنتهم من مقاعد البرلمان الوثيره ولم نري منهم غير الخضوع للمجلس العسكري واتهام الثوار بالبلطجه وتعاطي المخدرات.
٣-القيادات المسيحيه كلها تقريبا تحذو حذو الاخوان والسلفيين وتستغل مكانتهم عند الناس لتنفيذ اوامر الحاكمين للبلاد.
٤-الشعب انضحك عليه ولسه بينضحك عليه ويتم استنزاف قواه مجددا في سلسلة انتخابات مجلس الشعب المهدد بالحل في اي لحظه بعد صدور حكم من الاداريه العليه بحله وكذلك الانتخابات الرئاسيه التي سوف تزور بفعل الماده ٢٨ الملعونه.
٥-يؤسفني اقولكوا ان احنا ضايعين ضايعين لا محاله ... الا اذا قامت ثوره اخري وحسبنا الله هو نعم المولي ونعم النصير .

يوميات مواقف في بلاد الفرنجه وفي الوطن الام مصر الحبيبه ٢

٤- كنت في كندا بلد التلج وكنت بعدي الشارع في التاسعه صباحا وكانت الاشاره خضرا وفجأه لقيت ظابط بيزعقلي عشان ارجع لورا،انا مكنتش فاهمه هوا بيزعق ليه او عايزني ارجع ليه لان المسافه كانت بعيده ومكنتش سامعاه كويس، بس بالرغم من كدا سمعت الكلام ورجعت واستنيته يديني الاذن عشان اعدي الشارع،المهم وانا واقفه لقيت ست "كنديه" راحت معديه الشارع،فراح الظابط برضه انفعل وقعد يزعق عشان ترجع..بس للمفاجأه لقيت الست " اللي بالمناسبه كانت مزه جدا" راحت نازله شتايم في الظابط من كل الاشكال والالوان وبجد بقيت مستغربه قوي ازاي الشكل دا يطلع منه الالفاظ ديه!! وبعديها بدقيقتين بالظبط لقيت كل العربيات اللي كانت مستنيه الاشاره تفتح عشان تمشي -لقيت كل اللي راكبين فيها نزلوا وانضموا لينا ضد الظابط وكان العدد مالاليقل عن ٥٠٠ واحد مثلا وبجد اندهشت ان ازاي الناس اللي انضمت لينا دول - واللي شكلهم محترم جدا ومعظمهم لابس بدجات دكاتره ومحامين وراكبين عربيات فاااارهه - مشافوش مثلا ان الست دي مش محترمه وبتشتم وتستاهل اللي يجرالها وتستاهل ضرب النار !! واستغربت فعلا لانهم مضايقوش مننا عشان احنا معطلينهم علي شغلهم وزعقولنا وقالوا اسمعوا الكلام بقي وخلونا نعدي بلاش عطله ووقف حال!! لا اطلاقا كلهم وقفوا معانا ضد الظابط اللي بيستغل نفوذه ويغلس علي خلق الله
المهم ١٠ دقايق ولقيت عربية بوليس جايه ونزل منها راجل كباره كدا شكله يعني مايعادل مأمور القسم بتاعنا..فاستنتجت ان حد من الناس اللي واقفه "طلب البوليس عشان يشتكي من البوليس والبوليس جه عشان يزعق للبوليس"..المهم الراجل الكبير دا وقف اتكلم معانا وعرف الحكايه وللمفاجأه بقي خلي الظابط الغلس يمسك مكبر الصوت بتاعهم ويعتذرلنا قدام الناس كلهم وتم خصم الف دولار من مرتبه كعقاب ليه علي اهانتنا في وسط الشارع !! طبعا في ساعتها علي طول جه في بالي  مشهد قناص العيون بتاعنا "الشناوي بيه بتاع جدع يا باشا جبت عين امه" وشوفت فرق المعامله اللي تم مع الظابطين المصري والكندي ولقيت نفسي بتلقائيه بدندن أغنية ""بصيت لروحي فجأه لقيتني تعبت فجأه فتعبت من المفاجأه ونزلت دمعتي
الطامه الكبري بقي هيا اني بعد ماعديت الشارع للناحيه التانيه انا والست وناس تانيه كانت اتجمعت معانا ساعت ما الطريق اتقفل لقينا ان الشارع الناحيه التانيه كان بيحصل فيه تصلحيات وكانت في شاحنه ضخمه جدا بترصف الطريق وان الظابط الغلس كان بيحاول يرجعنا حفاظا علي حياتنا مش اكتر بس هوا اللي اسلوبه كان فظ شويه.


٥- كنت راجعه مصر في اجازه وقاعده اشم ريحة هوا مصر وانا نازله من الطياره،الهوا اللي كله حريه من غير المخلوع اللي كان كابس علي نفسنا ومحرم علينا نحلم لبلدنا غير بالكوابيس بس،دخلت المطار ووقفت في الطابور مستنيه دوري عشان اخلص الباسبور وادخل ارض الكنانه بقي،دوري قرب ووقفت علي الخط الاصفر ومسكت معايا بسبوري المصري الاخضر بكل فخر وسعاده و .. جه دوري.. روحت عند الشباك واديت للظابط باسبوري وابتسمت ..مسك الظابط الباسبور بقرف كدا وقعد يقلب فيه يمين وشمال وكل شويه يديني نظره ثاقبه من تحت لتحت كإنه شايف مجرم قدامه ولقي لقيه هيتسلي عليها انهارده!! حاولت اتجنب اي حاجه تضايقه وفضلت باصه في الارض لحد مايخلص ..
الظابط : انتي جايلنا من انهي حته بقي ان شاء الله
انا : من كندا يا فندم
الظابط : نعم يا ابله !! الباسبور بتاعك معليهوش اختام انتي طلعتي من هناك ازاي وكنتي قاعده هناك ازاي؟؟!!
انا : حضرتك هتفرق ايه انا جايه منين ولا كنت قاعده فين!! انا مواطنه مصريه ومعايا بسبوري المصري السليم ومن حقي ادخل بلدي
الظابط : راح باصصلي كدا بصه كان هيحرقني فيها من علي وجه الارض وبعدين لف للظابط التاني اللي قاعد وراه في الكابينه وراح مديله الباسبور وقاله خد بقي شوفلنا دا يا عم لما نشوف اخرتها ايه في الليله اللي مش معديه دي
انا ساعتها حسيت طبعا ان هوا بني ادم غلس ومش هيعديها فروحت مطلعاله باسبوري الانجليزي وقولتله اتفضل دا الباسبور اللي خرجت بيه ودا اللي انا قاعده بيه هناك،وكنت حابه ادخل بلدي بالباسبور بتاعي بس واضح ان حضرتك معترض !!
وبقدرة قادر لقيت الظابط اتحول ١٨٠ درجه وبقي كائن لطيف ومستأنس وضحكته ملت وشه لدرجة اني شفت فك سنانه كاملا من اقصي اليمين لاقصي اليسار وراح قايلي بمنتهي الرقه واللطف والظرف : يا فندم دا اجراء طبيعي لحفظ الامن وحضرتك تنوري بلدك في اي وقت
رديت عليه بجد والدم فاير من دماغي وقولتله يعني عشان انا دخلالك بالباسبور المصري تعاملني معامله زفت وكنت هتفضل موقفني قدامك لحد مايبانلي اصحاب ولما اطلعلك باسبور دوله تانيه غير مصر تشيلني فوق دماغك!! بجد حسبي الله ونعم الوكيل فيك انت واللي زيك
طبعا منطقش ولا كلمه وراح مخلصلي الباسبور المصري في ٥ دقايق ودخلت مصر الحبيبه وانا بجد دمي فاير
(يا رب اعيش يا مصر لما اشوفك دوله من دول العالم الاول واشوفك صاينه كرامتنا جوا وبرا والعالم كله ماشي وراكي)

يوميات مواقف في بلاد الفرنجه وفي الوطن الام مصر الحبيبه ١

١- كانت لسه الثوره خلصانه من يومين وحسني كان لسه مخلوع طازه ونشوه النصر كانت ماليه كل تفكيري ومش متخيله ازاي الشباب المصري البطل قدر يعمل معجزه زي دي،كنت في انجلترا ساعتها.ومسكت العربيه وغرقتها اعلام مصر كنت فرحانه بطريقه غير عاديه وكنت عايزه الناس كلها تعرف اني مصريه كان نفسي اقف في الشارع واكلم كل الناس عن مصر وثورة مصر وساعتها كنت رايحه لواحده صاحبتي وكنت مشغله اغنية "في كل شارع في بلادي صوت الحريه بينادي" ودموعي عماله تنزل وبجد مش قادره اتخيل ان الثوره نجحت وخلعنا الفرعون،المهم في وسط كميات هائله من الافكار الحالمه عن مستقبل مصر المشرق اللي مستنيها ..لقيت عربيه بتنورلي من ورا !! بصيت في المرايه لقيتها عربية بوليس..استغربت قوي وقولت جايز مش قصده  وانا اصلا معملتش حاجه غلط يعني فطنشت وكملت في الطريق عادي.. لقيته عمال ينور قوي وباصرار ودي معناها اني لازم اقف،اكيد وانا مش واخده بالي وسرحانه في الثوره روحت مزوده السرعه،المهم انا قولت انا هقوله اي حجه عشان اطلع بيها من الموقف دا وماخدش مخالفه..انا هقوله اني تعبانه قوي ورايحه المستشفي وعشان كدا كنت ماشيه بسرعه - يا سلام ياختي ايه الذكاء دا - اذا كان دا مش طريق المستشفي اصلا واساسا لو انتي سايقه وانتي تعبانه كدا العقوبه هتبقي اكتر!! ايوا ايوا عرفت انا هقوله انا رايحه اخد واحده صحبتي تعبانه وهوديها المستشفي واكيد هوا مش هيعملي حاجه وهيعديها عشان دا موقف انساني يعني..ايه دا ..انتي نسيتي ولا ايه؟؟ نسيت ايه مش واخده بالي!! نسيتي ان احنا لسه مخلصين ثوره وانتي قولتي بينك وبين نفسك انك كإنك اتولدتي من جديد وانك هتحاولي تتجنبي اي اخطاء انتي بتعمليها عشان تليقي بثوره عظيمه زي ثورة مصر وتستحقي لقب انك مصريه!! صح انا فعلا نسيت ..  حسمت امري بسرعه وقلت انا هقوله الحقيقه واللي يحصل يحصل ..انا غلطت ولازم اتحمل نتيجة غلطي واشيل المسؤوليه.
الظابط جااااي ..بيقرب في المرايه ..بيقرب قوي ..صورته اختفت من المرايه ووقف عند الشباك و...
"انا شوفت علم مصر في العربيه وحبيت اسلم علي الانسان اللي من بلد عظيمه زي مصر ضربت لينا اكبر مثل في الشجاعه والاخلاق والقوه والصبر" - دا كلام الظابط ليا وراح ضامم رجله جمب بعض و راح مديني تحيه عسكريه .. انا بصتله كدا بمنتهي الذهول وانا مبرقه عنيه ومرسوم علي وشي المعني الحرفي للاذبهلال ومش مستوعبه اصلا هوا بيقول ايه وقولتله انت مش جاي تديني مخالفه عشان انا كنت ماشيه بسرعه؟؟!! قاللي لا اطلاقا انتي مكنتيش مزوده السرعه اصلا انا بس من ساعة ثورة مصر وانا حياتي كلها اتغيرت وحسيت ان لازم انجلترا تتشبع بروح البطوله اللي موجوده عند المصريين وانا اتمني ان اولادنا يبقي عندهم نفس شجاعة الشباب المصري!!
المهم شكرته جدا واتكلمنا شويه عن مستقبل مصر ومشيت وانا مش مصدقه ان سمعة مصر بقت مسمعه في كل حته في العالم والعالم كله نفسه يبقي زي المصريين..طبعا انا نفسي اقابل الظابط دا دلوقتي عشان اعرف رأيه في مصر بعد مهازل المجلس العسكري .. بس بيتهيألي اني عارفه رأيه مسبقا .
٢- كنت في مصر من كام شهر وكان سامي ابن عمتي ومراته وعياله بيزورونا في البيت وقاللي ان هما اشتروا شقه جديده واني لازم اروح ازورهم،قولتله اكيد طبعا واخدت العنوان واستعديت يوم الجمعه واخدت علبة الشيكولاته المتينه وتوجهت للعنوان وعشان كان اول مره اروح المكان فدخلت عماره غلط وطلعت للدور الرابع حسب الوصف ورنيت الجرس .. تيتتننننن تيتتننننن - فتحتلي واحده ست كبيره في السن طبعا هيا مش قريبتنا باي حال من الاحوال فاستنتجت اني خبطت علي شقه غلط فقلت لما اسألها علي شقة سامي بقي بالمره بدل ماخبط علي حد تاني بالغلط
انا : سلامو عليكم ،لو سمحت هيا شقة سامي ابو العطا فين؟؟
الست : ساميييي !! سامي مين ياختي نجيبهولك منين سامي دا
انا : يا فندم انا بس غلطانه في الشقه مفيهاش حاجه لما حضرتك تساعديني يعني
الست : حرااام عليكوووااا ماتتهدوا بقي .. يا ابو حااااازم تعالي شوف يا خويا واحده بتوقلك انا عايزه سامي
انا : ميصحش كدا، دا مش اسلوب حوار ابدا !!
الست : اسلوووووب .. دانتي اللي اسلوب وستيييين اسلوب وريني يا بت العلبه اللي معاكي دي فيها ايه
انا : بت ايه وعلبة ايه !!عيب كدا والله مش اخلاق الثوره ميص...
"انا قولت ثوره من هنا وملحقتش اكمل اصلا ولقيت الست راحت طلعت في وشي زي القطر وهاتك يا شتايم"
الست : ثووووووررررررره !! كاتكم نيله عليكوا وعلي الثوره واللي جرالنا من الثوره واللي خدناه من الثوره داحنا قاعدين في بيوتنا زي الجحور من ساعت الثوره وقافلين علي نفسنا بالاقفال.. (دا طبعا بالاضافه لكمية شتايم تانيه تم حذفها لاسباب رقابيه)
المهم خدت بعضي ونزلت وانا بجد فطسانه علي روحي من الضحك عشان بجد الست دي فكرتني بالست اللي كانت في فيلم ابو علي اللي كانت بتضرب عيالها عشان اكلوا الجبنه وفي نفس الوقت هموت من الزعل عشان الانفلات الامني المتعمد وصل الست للحاله دي وخلاها تخاف من خيالها وتختفي في بيتها وتكره الثوره واليوم اللي اتعملت فيه الثوره.
٣- كنت في انجلترا برضه وكنت ماشيه في الشارع وبعدين حسيت ان حد ماشي ورايا فبصيت ورايا لقيت واحد عادي يعني ماشي ،المهم كملت مشي بس برضه حاسه ان هوا ماشي ورايا انا..فروحت هديت مشي خالص وعملت نفسي بدور علي حاجه في الشنطه بحيث ان هوا يسبقني وابقي شايفاه قدامي،وقد كان، سبقني فعلا وفضل ماشي قدامي..وبعدين مره واحده لقيته لف كدا وقعد يبصلي وراح مقرب عليا ..انا قولت مبدهاش بقي لازم اكلم البوليس،روحت في ثواني طلعت الموبايل وطلبت ٩٩٩ ولسه بحط الموبايل علي ودني لقيت الموبايل بيتشد من ورا!! اكتشفت ان فيه اتنين تانين كانوا معاه بس انا مكنتش واخده بالي.. فلقيت نفسي بجد مش عارفه اعمل ايه وانا متحاصره بينهم ..وبعدين افتكرت جهاز الانذار الشعبي برنة ييييييييييييلهويييييي اللي موجود بيلت ان بالسليقه جوا اي مصريه اصيله..بس وعينك ماتشوف الا النور..هما صريختين بس وهوبااااااا لقيت اتنين ظباط بوليس ظهروا من العدم..علي فكره انا مبهزرش هما ظهروا من العدم فعلا!! يا اما هما في انجلترا عندهم تقنية الانتقال الاني بتاعة المقدم نور الدين محمود .. المهم راحوا ناطين عليهم زي مابيحصل في الافلام الاجنبي بالظبط وقعدوا يشموا حوالين بقهم يشوفوهم سكرانين ولا لأ بس استغربت انهم مضربوهمش ولا شتموهم مع ان الظباط كانوا مدججين بالسلاح وقبضوا عليهم واتحطوا في عربية البوليس والحمد لله عدت علي خير وروحت البيت في موكب بوليسي خزعبلي.. والصراحه انا كنت متفاجأه جدا من اللي شفته لان سلو بلدنا ان الظباط بتضرب المواطنين مش الحراميه وسلو بلدنا كمان ان الظباط اللي بتقتل المواطنين وبتعميهم بيترقوا ومرتباتهم بتزيد.. عجيبه قوي دول الفرنجه دي !!

احنا صابرين صابرين صابرين.

"احنا صابرين صابرين صابرين"  الجمله دي مش الجمله الشهيره اللي قالها حامي حمي الديار المصريه طنطاوي بيك ذو التصريحات اللوذعيه.. نو..ابسلوتلي
دا بقي شعور كل مواطن مصري روحه بقت في منخيره وساكت وكاتم وعمال يقول احنا صابرين صابرين صابرين من ساعة ما المخلوع سرق فلوس الشعب ونهبه وقتل خيرة شبابه واحنا صابرين وبقاله سنه كامله مخدش حكم واحنا صابرين وبقوا ينقلوه بطياره خاصه للمحاكمات واحنا صابرين ،والظباط المتهمين بقتل المتظاهرين اللي كل يوم والتاني يطلعوا براءه "عشان هما كانوا بيدافعوا عن نفسهم من البلطجيه اللي حرقوا الاقسام طبعا" بس الصراحه بيني وبينكوا عجبوني قوي لما كدبوا الكدبه وصدقوها وخلونا كلنا نصدقها معاهم وخلونا ننسي ان المظاهرات اللي نزلت يوم ٢٥ كانت سلميه اصلا وردت عليها الشرطه بمنتهي الوحشيه من قتل وسحل وموت شباب بالقناصه "اللي مش موجودين في وزارة الداخليه" فقام الناس رادين عليهم بحرق الاقسام!! ايوا يا ساده هيا دي الحقيقه ان اللي حرقوا الاقسام متظاهرين مش بلطجيه!!  هتقولي يبقي بتكدبوا لما بتقولوا الثوره سلميه؟؟!! هقولك لأ..هيا سلميه فعلا عشان المتظاهرين اختاروا انهم ميقتلوش الظباط مع انهم كانوا يقدروا واختاروا انهم يحاكموهم بالقانون وحرق الاقسام دا عملوه عشان يكسروا دراع الشرطه وهيا دي الحاجه الوحيده اللي هزمت الداخليه وخلعت مبارك لما دراعه الامنيه اتكسرت،فإذن متحكوش الحكايه من الاخر وتقولوا دا البلطجيه حرقوا الاقسام،لأ قولوا المتظاهرين كانوا بيردوا علي قتل الداخليه ليهم بحرق الاقسام!! خلاص وضحت كدا!! طيب نرجع نكمل كلامنا ونقول احنا صابرين صابرين صابرين ليه!!صابرين عشان يوم مامجلس الشعب بتاعنا الهمام اصدر "توصيات" ان المخلوع يتنقل مستشفي طره استجاب المجلس العسكري لتوصياتهم علي الفور وادوا اوامر ببناء "مستشفي جديده" في سجن طره عشان تليق بمقام البيه المخلوع الحرامي بتكلفه اكتر من ٤ مليون جنيه في الوقت اللي مصابين الثوره بيقيدوهم بالكلابشات في سراير المستشفي دا لو لقوا سراير مستشفي يتعالجوا عليها اصلا!! وفي نفس الوقت كلفوا محمد حسان ،اسفه يا جماعه قصدي "الشيخ" محمد حسان بدل ماتشتم في اول تدوينه ليا الحكايه مش ناقصه - كلفوه بانه يلملهم لا مؤاخذه فلوس من الغلابه اللي مش لاقيين ياكلوا عشان قال ايه يدوها للمجلس العسكري ونستغني عن اللامؤاخذه  المعونه الامريكيه اللي هيا بتجيلنا سلاح اصلا!! وصابرين كمان علي كمية مذابح خزعبليه بقت بتحصل كل شهر تقريبا ويروح فيها كام شاب علي كام ميت مصاب علي كام ميت واحد يتاخدوا ظلم في محاكمات عسكريه..واخرها مدبحة بورسعيد اللي مات فيها اكتر من ١٣٠ شاب كل ذنبهم انهم كانوا رايحين يشجعوا ماتش كوره!! وطبعا مجلس الشعب الهمام صال وجال وثار ونزل علي "لجنه" انبثقت منها لجنه تانيه وكالعاده منبثقتش عنهم اي نتيجه ولسه محدش اتحاسب علي الجريمه البشعه دي لحد انهارده.
انما كل الجرايم الي فاتت دي كوم وفضيحة الامريكان اللي خرجوا من مصر غصبا عن عين المجلس العسكري دي كوم تاني!! الفضيحه دي خلت كل واحد فينا ماشي ومتعلم علي قفاه صوابع حمرا كبييييره أاااااد كدهون من قلة القيمه اللي بقينا فيها،وانا اللي طول عمري كنت فاكره احمد حلمي بيهزر لما قال "انا مواطن امريكي وماي باسبورت حاميني واقدر ادي اي حد بالجزمه" - اتاريها طلعت بجد وبحق وحقيق وبصدق وصديق .. وفضلوا ماسكينا صبح وليل ليل وصبح داخله خارجه خارجه داخله في التليفزيونات والراديوهات وبقينا نفتح الحنفيات نلاقيهم نازلين يقولولنا مصر لن تركع وشويه وكانوا هيطلعولنا من البلاعات عشان برضه يقولولنا مصر لن تركع وهرونا كلام من الكبير قوي دا اللي بيثبت الناس اللي في الشارع والناس انتفخت اوداجها كدا وبقوا ايييه ياما هنا ياما هناك وكل واحد  بقي ماشي في الشارع يقول هع المصري معروف بجبروته وقوته ويتنفخ كدا ويقول بعلو صوته وربنا لنيمك من المغرب يا امريكا!! قووم ايه خير اللهم اجعله خير يا ولاد يطلع يا خويا كل دا نصب وكدب وحضروا العفريت ومعرفوش يصرفوه وفي الاخر العفريت لبسهم وخلي رقبتهم اد السمسمه لدرجة ان احمد ظوبايضربذات نفسيته شتم المجلس العسكري والامريكان سافروا بلدهم في مدرعات جيشنا اللي حمي الثوره وطبعا كله بما لا يخالف شرع الله وبعدين استني مجلس الشعب ينتفضوا لدقونهم اللي واصله لركبهم ويكونوا رجاله

 ويقفوا وقفة رجاله ..انما كلهم طلعوا لا مؤاخذه يعني ... وطلع لنا البلتاجي يقولنا

انالاوان ان مصر يجيلها حكومه تليق بيها - وطبعا التصريح دا ملوش غير رد زياد

 العليمي اللي قال "كل مره تسيبوا الحمار وتمسكوا في البردعه"

و يطلعلك عمو كرونبو يقولك سؤال انهارده من المفتش كرونبو: مين اللي هرب

 الامريكان ١- الواد سنطاوي ملك المطاوي. ٢- الحاج وديع اللي بيضيع. ٣- الست فايزه اللي لهفت الجايزه.

وطبعا لو عرفت الاجابه اوعي تتصل لحسن هتاخد ١٠ سنين ظلم في محاكمه عسكريه.

وفي وسط المعمعه دي يطلعلك الملثم ربنا يباركله اللي تقريبا هوا الشخص الوحيد

 اللي لسه مركعش في البلد دي ويفجر خط الغاز للمره ال ١٣ وطبعا المجلس 

العسكري مخدش باله وكان الله في عونه عشان كان مشغول بالركوع للامريكان

 واكيد طبعا زمان نتنياهو جاب اخره من الحكايه دي هوا صبر كتير برضه يعني

 علي التفجيرات اللي المسؤليين المصريين مش عارفيين يوقفوها عند حدها دي 

فراح ماسك سنطاوي من ودانه وقاله :مأمنتش خط الغاز ليه يا سنطاوي؟؟يقوم

سنطاوي يرد وهوا مكسوف ووشه في الارض ويقول : نسيت .. نسيت

يقوم نتنياهو واخد جزمته اللي اتسرقت قبل كدا ومعلقهاله علي باب وزارة الدفاع

 وقايله : نسيت تاكل ؟؟ نسيت تشرب ؟؟ نسيت تحبس في الثوار؟؟نسيت تخلي

 الشيخ فهمان يضحك علي الغلابه وياخد قوت يومهم عشان تحطه في كرشك؟؟الا بالمناسبه هوا ال ٦٠ مليون اللي لمتوهم راحوا فين ؟؟!!

وفي عز الانفلات الامني وفي عز السطو المسلح اللي بقي في كل مكان وفي وضح

 النهار وعلي عينك يا تاجر يطلعلك بتوع الداخليه يكرموا مروه الرقاصه!! ايوا ايوا

 انت سمعت صح .. مروه بتاعت الصراحه راحه يا سيدي وانت مبتعرفش،طب واحد

 نبيه هيطلع يقولي هما كرموها ليه؟؟ هقوله عشان ساهمت في رفع الروح المعنويه

 للظباط اللي نفسيتهم اتكسرت بعد الثوره ولا حول ولا قوة الا بالله.ومعلش سؤال

رفيع بالنسبه لاخوانا الاسلاميين اللي في البرلمان اللي قعدت استني منهم انهم

 يقيموا الحد عن المسؤول عن تكريم واحده زي ديه او حتي يشجبوا ولا يدينوا!!

 لكن كلهم مع بعض قالوا في نفس واحد "قولت يا واد طنش خاااااالص" وعملوا

 دن من طين وودن من عجين،بس هما لو يسمحولي اسألهم واحرجهم واقولهم

 هوا تكريم الداخليه لمروه الرقاصه "مهزش" هيبة الدوله؟؟ ولا هيا هيبة الدوله 

مبتتهزش غير لما تبقي حاجه ضد مصالحكوا بس؟؟!!

لا وبعد كل المهازل دي يطلعلك نائب سلفي تقريبا كان راكب الة الزمن بس شكله

 كان مزوغ من الكمثري فتقريبا الكمثري قفشه ونزله في المحطه الغلط فلقي نفسه

 في عالم موازي فقالك انا اطالب بالغاء اللغه الانجليزيه من التعليم عشان دا

 مخطط!!هوا كله مخطط مخطط.. مفيش كاروهات خالص!!

وكل دا يقودنا للحقيقه المجرده وهيا ان فقط تحت حكم العسكر يتم تعرية الشرفاء وتكريم الراقصات.

بس يا جماعه برضه الواحد يقول اللي ليه واللي عليه،ان طالما الامريكان سافروا

 ان بابليك ومفيش فيلينجز ..يبقي سووو وااات؟؟

لا وشوف حكمة ربنا يا مؤمن، في عز ازمة البنزين اللي مصر فيها دي وان الناس

 بتموت عشان انبوبة البوتجاز نكتشف ان اسرائيل بتصدر باقي الغاز المصري اللي 

احنا بنديهولها بملاليم - بتصدره للهند وبالسعر العالمي كمان واللهم اني لا اسألك

 رد القضاء ولكن اسألك اللطف فيه يا ارحم الراحمين،ويطلع طنطاوي يقولك لقد

 ستجبنا لامال وطموحات الشعب المصري العظيم بتحقيق اهداف ومطالب ثورة ٢٥

 يناير العظيمه ..... هااأوووو.

بجد عايزه اقول ان الفساد ملي الكيس ودلدق وبقينا عايزين نجيب براميل نعبي فيها

 الفساد بدل ماهنغرق الارض كدا

وعايزه اقول كمان ان دموع المظلومين هي في اعينهم دموع ولكنها في يد الله

 صواعق يضرب بها الظالم - مصطفي صادق الرافعي

واخيرا عايزه اقول انه لابد من يوم معلوم تترد فيه المظالم ابيض علي كل مظلوم

 واسود علي كل ظالم،هوا اينعم لحد دلوقت اسود علي كل مظلوم بس كلي ثقه في 

الله وانا بقول ان يومهم جاي وقرب قوي كمان وانما يؤخرهم  الله ليوم تشخص فيه الابصار