لقد وقعنا في الفخ

ايوا يا ساده يا محترمين يا افاضل لقد وقعنا في الفخ ..من ساعة ما تخيلنا ان من "اذا تحدث كذب واذا وعد اخلف واذا اؤتمن خان" ممكن يكمل مطالب الثوره او حتي يفهم يعني ايه ثوره!! اوعي تكون مش عارف انا بتكلم عن مين؟؟طبعا انت عارف..عارف ان ايات المنافق الثلاثه دول لا تنطبق الا علي اللي خربوا البلد واتصالحوا مع مجرمين مبارك  واللي بيبيعوا البلد بالحته لقطر ..ايوا هم دول ..الاخوان المسلمين..قصدي الاخوان المضللين ..وقعنا في الفخ من ساعة:
ما ادينا صوتنا لحامي حمي الديار المصريه..
 صاحب الجوابات الغراميه لبيريز ابن الفقريه ..
والمتراجع الدائم عن كل مواقفه وقراراته الابديه..
 صاحب تعيين نائب عام ملاكي للاخوانجيه ..
واللي كذب وغير في كلامه في الدعوه علي اليهود لما خاف لتزعل الاداره الامريكيه ..
واللي بقدرة قادر حول القرض ذو الفوائد الربويه لمصاريف اداريه ..
والثوري الشريف اللي هتف ضد القرض شوهه وقال عليه دا مناصر للعلمانيه ..
اللي اتهم كل اللي عند الاتحاديه انهم فلول ومخرباتيه ..
وبعدين طلق جيشه الكلامنجيه يقولوا علي الحزب الوطني دول اخواتنا في الوطنيه ..
واللي كذب علينا وقال انا مستشار لناسا الامريكانيه ..
ولما اتفضح قال دانتوا فهمتوا غلط انا ولا قولت ولا كتبت في السيره الذاتيه..
 واللي كل كارثه عايزين يمرروها يلزقوا فيها كلمة اسلاميه..
 زي مشروع الصكوك اللي بموجبها هيبيعوا البلد ديا ..
ولما لقوا الازهر رفضها شالوا اسلاميه وعرضوها علي مجلش الشوري الترزيه ..
عشان يوافقوا عليه ويبيعوا البلد ويجوعوا اهلها الكفاحتيه !!
طب لسه مش مصدق اننا وقعنا في الفخ؟؟ طب خد عندك يا عم التاريخ المشرف للجماعه من اول يوم في الثوره:

24 يناير 2011: الإخوان يعلنون عدم مشاركتهم في 25 يناير
2 فبراير: الإخوان يتفاوضون مع عمر سليمان
أخر فبراير: الإخوان لن ينافسوا إلا علي 30% من البرلمان

مارس: التصويت بنعم واجب شرعي

أبريل: الإخوان لن يرشحوا أحد للرئاسة

يوليه: الإخوان مع المجلس العسكري وضد المعتصمين الهادفين للفوضي

أخر يوليه: الإخوان يتظاهرون تأييدا للمجلس العسكري ومن أجل الشريعة

أغسطس: الإخوان سينافسوا علي 50% من البرلمان ولن يرشحوا رئيس, تحت شعار مشاركة لا مغالبة

نوفمبر: الإخوان يعلنون أن أحداث محمد محمود تهدف لنشر الفوضي وتعطيل الإنتخابات والعرس الديمقراطي

ديسمبر: الإخوان يعلنون أن أحداث مجلس الوزراء شهدائها بلطجية وخلفها مخطط أجنبي

يناير 2012: الإخوان يحتفلون بإنتصار الثورة ويمنعون معارضي العسكر من الهتاف ضد العسكر في ميدان التحرير

مارس 2012: الإخوان يرشحون الشاطر للرئاسة ويطرحوا مشروع متكامل للنهضة وأهداف لل100 يوم

أبريل 2012: الإخوان يرشحون مرسي للرئاسة ويأخدوا مشروع النهضة من الشاطر ويدوها لمرسي

يونيه 2012: الإخوان ضد العسكر ومع تأييد القضاء النزيه

يوليه 2012: يعدون بالمشاركة في السلطة وعدم الاستحواز ودستور متوازن

أغسطس 2012: الإخوان يكرمون طنطاوي وعنان بقلادة النيل

أكتوير 2012: الإخوان يضعون الدستور بمفردهم وخيرت الشاطر يقر  بإنه لا يوجد 

مشروع نهضة اصلا

نوفمبر 2012: الإخوان يتذكرون إن القضاء فلول ومرسي يصدر اعلان دستوري دكتاتوري بتحصين جميع قراراته وتحصين التأسيسية ومجلس الشوري ويسيطروا علي القضاء بتعيين نائب عام ملاكي اخواني
وبعد تظاهر مئات الالاف من المعارضين لديكتاتورية مرسي طلق عليهم اهله وعشيرته وقتلوا الشباب وفي الاخر طلع بخطاب كاذب يقول ان اهله وعشيرته كانوا سلميين ويتهم جميع متظاهري الاتحاديه انهم فلول!!
وبعد ما فضل مصدعنا هو واهله وعشيرته ان كل المعارضه فلول وخايفين من التطهير راح هو بنفسه وعين الفلول في مجلس الشوري اللي استلم السلطه التشريعيه دلوقت!!  

طب نقول كمان ولا كفايه؟؟ بجد لو عايزين كمان موجود وكله مسجل وموثق!
طب الحل ايه طيب؟؟
هتقولي المعارضه كلها زباله ،هقولك صح المعارضه فعلا مواقفها مش عاجبانا وتحس انهم مهلهليين كدا،بس هقولك علي حاجه،فاكر لما اتزنقنا بين الاخوان وشفيق وجينا علي نفسنا وعصرنا لمون وقلنا مش مهم اخوان اخوان اهم حاجه الثوره وهنبقي نضغط عليهم عشان نحقق اهدافها!
اهو بعد ما شفنا الاخوان بقينا مزنوقين نفس الزنقه بين الاخوان اللي ثبتت خيانتهم لمصر وللثوره وبين المعارضه اللي احنا لسه مشفناش حكمها،يبقي تختار ميييين؟؟!!
انا عن نفسي هختار المعارضه،وهفضل اديهم علي دماغهم عشان يمشوا عدل ويحققوا اهداف الثوره وهدعوا بكل قوتي لمظاهرات ٢٥ يناير،مش عشان شوية طلبات اصلاحيه الاخوان يرموهالنا يسكتونا بيها،لأ،انا هدعوا لاسقاط النظام.
ولعل الله يحدث بعد ذلك امرا ويرزقنا المنقذ لمصر والمخلص من دول ودول. 

علمانية اردوغان !

جاء اليوم المنتظر ،الرحله اللي بستناها بفارغ الصبر ..هروح تركيا هييييييييييه :)
انا كنت روحت تركيا زمان مع اهلي قبل ما اردوغان يمسكها وبجد كنت عايزه اشوف بقي اردوغان اللي الكل بيتحاكي عليه عمل ايه في البلد ونقلها من حال لحال ازاي وعايزه اثبت  ان فكرة مدنية الدوله هي فعلا الطريق الصحيح اللي لازم نطبقه في مصر عشان مصر تتقدم !
المهم بدأنا الرحله ويا سلام علي الشوارع ونضافة الشوارع والمرور منظم والبلد رااائعه فعلا .. بس .. "بس دي لازم نعرف ان هيجي بعدها حاجه مش كويسه" .. شويه ولقيتلك واحده محجبه ماشيه في الشارع ولابسه حجاب ساتر جدا من فوق "بس" علي جيبه ميكروجيب !! ايوا والله مش بهزر جيبه ميكروجيب..او مثلا انك تبقي راكب المترو وتلاقي شيخ كباره كده وعليه القيمه ومربي دقنه لحد ركبه ولابس بنطلون قصير اقتضاءا بالسنه "بس" الوشم مالي دراعه من اوله لاخره!! او تلاقي واحد بتاع ربنا برضه ماسك سبحه بايده اليمين وعمال يذكر ربنا "بس" بالايد الشمال ماسك ازازة خمره :D
او انك تلاقي واحد مسلم -والله العظيم مسلم- "بس" مضايق جدا ان عدد المساجد زاد في تركيا وشايف ان دي حاجه وحشه جدا -اللهم لا راد لقضاءك- :(
او انك تلاقي واحده مسلمه ومحجبه حجاب بجد بقي وعبايه واخر تمام وحشمه "بس"واحد ماسكها في المترو وهاريها بوس :( واللي يلفت النظر مش البوس ،لأ، اللي يلفت النظر ان الناس في المترو عادي خالص يعني مش في دماغهم اللي بيحصل دا لدرجة ان لو باباها نفسه كان شافها مكانش هيضايق يعني،عادي خالص، وبعد شويه اكتشفت ان كل الشوارع فيها كدا والناس برضه عادي!! وهنا لازم نفرق انه احنا مش في بلد كافر وملحد وملوش ديانه،لانه احنا لو في بلد كدا كان بقي عادي انما تبقي في بلد مسلم وتعمل فعل فاحش في الطريق العام ويبقي عادي فهو دا اللي مش عادي !
او الكبيره بقي انك تدخل مزار سياحي هو مكانش في الاول مزار سياحي هو كان كنيسه وبعدين قلبوه مسجد وبعدين رجعوه كنيسه وبعدين اتخنقوا بقي علي الاخر فعملوه مسجد وكنيسه مع بعض وبقي مزار سياحي!! تدخل المكان تلاقي اسم سيدنا محمد عليه الصلاة والسلام واسامي الصحابه رضي الله عنهم في الجدران والسقف تلاقي مرسوم عليه سيدنا عيسي وستنا مريم :(( يعني هي ام البلد خلصت يعني عشان يمسكوا المكان دا ويعملوه جامع وكنيسه مع بعض؟؟
وكل البلد كدا بقي النص اللي فوق مسلم والنص اللي تحت خمر وميسر ونساء،وتحس ان عندهم شيزوفرنيا هما مسلمين اسما بس فعلا لأ ،هتقولي مصطفي كمال اتاتورك هو اللي عمل كدا وخلي تركيا علمانيه..صح؟؟ هقولك انت لو كنت شفت السلاطين العثمانين كانوا عاملين ايه في حياتهم وعيشتهم كنت هتنزل انت تخلعهم بنفسك !! دول سلاطين لازم يتخلعوا فعلا ،تدخل قصر الواحد منهم تلاقي القصر مساحته لا تتخيلها عامله ازاي البحر من اليمين وجناين ملهاش اول ولا اخر من الشمال ،جوه القصر ترف وبزخ وسفه في كل مكان لدرجه ان الكراسي اللي كانوا بيقعدوا عليها كانت معموله من الذهب والالماظ والاحجار الكريمه والاطباق والحاجات اللي بياكلوا فيها شرحه،نجفة السقف وزنها ٤ طن ونص !! عمرك شفت حاجه كدا ؟؟ اكيد لأ ولا عمرك هتشوف،دانا اكتشفت ان المخلوع بتاعنا كان غلبان ومعدوم وفقران :D
يبقي اتاتورك كان عنده حق يخلعهم .
البلد حلوه سياحيا وامنيا وكل حاجه لكن متتحبش تحس ان الناس تايهه ومش عارفه هي عايزه ايه وانا مش عايزه مصر تبقي كدا،بعد ماشوفت علمانية اردوغان عايزه الاخوان المسلميين يسيطروا علي البلد ويخلوها اسلاميه اسلاميه :D
لا بهزر علي فكره انا عايزه ناخد من تركيا الحاجات الكويسه يعني تجربتهم الاقتصاديه والسياحيه والامنيه ونسيب التجربه الدينيه لحسن فاشله تماما :((
و"بس" كدا 

يسقط جيش طنطاوي

الجيش المصري خاين واللي لسه عايز يضحك علي نفسه هو حر بس ميفرضش علي اللي قدامه انه يلغي عقله!! .. لما الجيش المصري يدوس بمدرعاته علي اهل بلده ويدهسهم تحت عجلاتها يبقي ايه؟؟ ولما الجيش يرفع سلاحه ويضرب رصاص علي اهل بلده يبقي ايه؟؟ ولما يعري بنات بلده في الشوارع وينتهك حرماتهم يبقي ايه؟؟لما الجيش يبيد المتظاهرين ويحرقهم بغازات محرمه دوليا في محمد محمود يبقي ايه؟؟لما الجيش المصري يعتقل اكتر من ١٢ الف مصري ويعذبهم وينتهكهم بقمة الوحشيه يبقي ايه؟؟ لما الجيش المصري يامن المخلوع وعصابته بحياتهم اللي قتلوا الشعب ومصوا دمه يبقي ايه؟؟ لما الجيش المصري يفرط في حق ال ٧ جنود إللي قتلتهم إسرائيل في سيناء واللي ماتوا في السنين اللي قبلهم يبقي ايه؟؟... ولما يفرط في حق الجثث المصرية إللي بيستلمها من حدود سيناء كل فترة يبقي ايه؟؟ متقوليش دا المجلس العسكري عشان هقولك ولا عنان ولا طنطاوي هما اللي بيضربوا الناس في الشارع هقولك جنود الجيش هما اللي بيقتلوا اهلهم في الشوارع!! هتقولي اصلهم جنود غلابه بياخدوا الاوامر هقولك اومال ربنا قال في القران "إن فرعون وهامان (وجنودهما) كانوا خاطئين" ليه؟؟ مقالش فرعون وهامان بس ليه؟؟ عشان الجنود هما اللي بيساعدوهم وبيفرعنوهم وفرعون وهامان من غير جنودهم هيبقوا ولا حاجه وبالمثل طنطاوي ومجلسه من غير جنودهم هيبقوا ولا حاجه!! لو انت مقتنع مليون في الميه ان الداخليه فاسده ولازم تتحل لكن الجيش دا اخويا واخوك تبقي غلطان عشان الداخليه برضه اخويا واخوك ورفعوا سلاحهم وقتلوا شعبهم!! لو عايز تعرف يعني ايه جيش وطني اتفرج علي جيش تونس اللي رفع سلاحه في وش الداخليه بتاعتهم عشان يحمي شعب تونس!! جمع كل المشاهد دي وانت تعرف ان الجيش المصري خاين..عارف انت ليه عايز تغمض عنيك عن كل الحقائق اللي فاتت دي عشان انت عارف انك لو اعترفت بالحقايق دي دا هيكون معناه حاجه واحده بس وهي المواجهه وانت مش عايز مواجهه انت عايز تلعب تمثيلية الانتخابات عشان تبقي قال ايه يعني انتصرت ومشيت العسكر مع ان انت عارف بينك وبين نفسك ان اي انتخابات تحت رعاية قتالين القتله هتبقي زي قلتها وهتجيب اللي علي مزاجهم او هتجيب واحد طرطور يحركوه ..ومع ذلك برضه انت حر في رايك لكن متتهمش اللي مش عايز يغمض عنيه ودماغه انه خاين او انه بيولع الدنيا عشان هو مش كدا!!
يسقط جيش طنطاوي 

خواطر

لما بكون مضايقه قوي يبقي دا معاد الكتابه،"محدش بيتجرح قوي غير اللي بيحب قوي" الجمله دي اللي قالها مصطفي شعبان لمني ذكي في الفيلم وانا كنت علي طول بستخدمها في تريقه..بس مع الاسف دلوقتي بجد حساها..ساعات تبقي مستني رد فعل من حد معين علي حاجه معينه وتلاقيه اصلا مش فارقه معاه او تبقي مستنيه يهتم بيك انت اكتر من اي حد بس بجد مش بتلاقي دا وبتزعل قوي لما بتشوف كل الناس اللي هما مش فارقين معاك مهتمين بيك قوي ،مهتمين بيك بالطريقه اللي كان نفسك الشخص دا يهتمها بيك
ساعات بيتهيألك انك بتضحي تضحيه غير عاديه وانك بجد جاي علي نفسك لاخر درجه وانك واصل لاقصي درجه من التعب والانهاك البدني والنفسي عشان تسعد الشخص اللي انت بتحبه  وفي الاخر تصدم ان هو مش شايف ان دي تضحيه اصلا  وان دا الطبيعي
واللي بيوجع اكتر لما تتحط في موقف وتبقي محتاج فيه مساعدة الشخص دا وتتفاجإ بحجج من كل شكل ولون للخروج من الموقف..شويه من الحجج دي بتبقي مقبوله وشويه لأ،بس حتي لو الحجج دي مقبوله هو انت يعني متستاهلش انه يضحي شويه  عشان يقف جمبك!!
الكلام دا ممكن تستحمله مره اتنين تلاته عشره او حتي ٢٠ مره لكن لما تبص وراك وتلاقي ٨ سنين من حياتك فاتوا وانت كدا ..يبقي ايه الحل؟؟
يبقي عادي تقول انا هكمل ويبقي الحال كما هو عليه ولا تتأسف وتعتذر وتقول انا اكتفيت خلاص ؟؟!!
والسؤال المهم دلوقت:هو الشخص اللي انا كاتبه الكلام دا عشانه هيقراه اصلا؟؟ !!

حلزونة ابو اسماعيل

طيب .. بعد ما لفيت حوالين نفسي خلال الاسبوعين اللي فاتوا من تصريحات ابو اسماعيل لقرارات وبيانات اللجنه العليا للانتخابات وكمية اخبار خزعبليه رايحه جايه من الصحف والقنوات توصلت في الاخر الي الاتي .. انا فعلا مش فاهمه اي حاجه .. هو مين بيقول ايه !! الصراحه انا لا اثق في المجلس العسكري وعارفه ومتأكده مليون في الميه انه بيدبر كل المكائد اللي نتخيلها واللي منتخيلهاش عشان يبوظ الانتخابات الرئاسيه او علي القليله يجيب ناس من الفلول عشان يحافظوا علي النظام وبرضه متأكده من فساد اللجنه العليا للانتخابات ومتأكده ان الداخليه فاسده فساد التنين المجنح وعارفه ان نظرية المؤامره بقت بتهاجمنا في ادق تفاصيل حياتنا من كمية الاكشن اللي احنا عايشينه -دا ولا فيلم ميشن امبوسيبل ٤- !!
بس الفكره برضه ان ابو اسماعيل قال حاجات كتير غلط وفتي فتي الابل وفي حاجات مش قادره ابلعهاله فعلا  بس بجد تقيله عليا اني اصدق ان شيخ زيه يكدب.. هو اينعم بشر وبيغلط عادي زينا بس مش عارفه مش مرتاحه حاسه ان الحكايه فيها ان .. يعني هل هو زي اللي بيحصل في افلامنا العربي تلاقي واحد بيبقي غلبااااااان ولا بيهش ولا بينش والناس عماله تفتري عليه طول الفيلم وانت تبقي قاعد هتعيط عشانه وفي الاخر يطلع هو رئيس العصابه :)
ولا هو فعلا مظلوم وواقع تحت براثن مؤامره سحريه معقده مترامية الاطراف ومتشابكة المطامع والاهداف ؟؟!!
وبناءا عليه .. قررت التزام الصمت تماما في الموضوع واني ولا هنقل اخبار ولا هنزل تعليقات عن الموضوع دا نهائي لحد ما تبان الحقيقه واعرف مين الغلطان ومين الكداب عشان اصب عليه جااام غضبي وليلته هتبقي سوده بإذن واحد احد 
بس ليا تعليقين، الاول : هو ان انصار ابو اسماعيل بجد متعصبين لدرجة العمي وفعلا كرهوا الناس فيه،لا بالعكس دا ممكن يخلوا الناس تروح تختار واحد زي عمر سليمان عشان يهربوا من سيناريوا التعصب والتطرف ولازم يحطوا في اعتبارهم ولو واحد في المليون انه بشر غلط وبيغلط وهيغلط زينا كلنا ..كلنا شوفنا تعصبهم الاعمي واللي عملوه في التحرير من تكسير المنصه والسؤال الاتي ليهم:هل لو ابو اسماعيل بقي رئيس وانتوا بتعاملوه معاملة التقديس دي، هل لو غلط هترضوا ان حد يحاسبه؟؟!!ولا هتعتبروه فوق المحاسبه؟؟!! وعايزه افكركم ان مبارك الناس كانت بتهلله اول ماجه وبتشيله علي كتفاها !! اذن نحن من يصنع الفرعون فاستفيقوا يرحمكم الله.
الثاني : بعد مراجعة كميه ليست بالقليله من فيدوهات ابو اسماعيل اكتشفت انه يفتي بما لايعلم ويوهم الناس بان هذه  حقيقه واقعه وعلي الناس ان تقول سمعنا واطعنا وانه يملك من المكابره والغرور ما يمنعه من الاعتراف باخطائه ولا يطيق من يخالفه في الرأي..فبناءا عليه سواء كان ابو اسماعيل صادق ام كاذب فلن اعطيه صوتي في الانتخابات لاني بصراحه اتخنقت من الفيرجن دا، احناعايزين حد لطوف لذوذ كدا ياخد ويدي وننتقده ويسمع كلامنا ويبقي ايزي وبيس والدنيا سهله معاه :)
وربنا يظهر الحق وينصر مصر وثورة مصر نصرا مبينا ان شاء الله .

في وصف الاخوان المسلمين

سرحت في ما آلت ايه تصرفات جماعة الاخوان المسلمين خلال العام المنصرم وصعقت من تحولهم من صيغة المظلوم الي صيغة الظالم،وتهت واحترت في دفعه هائله من نقض الوعود وخيانة الثوره والثوار وعقد الصفقات مع المجلس العسكري بما يضمن لهم الكراسي الوثيره والمناصب الرفيعه وان يسطوا علي كل ما تطاله ايديهم وارجلهم ورماحهم واكتشفت حقيقه بسيطه وهي ان جماعة الاخوان المسلمين لم تظلم وتسجن من قبل النظام البائد من اجل مصلحة بلد او شعب قط، فهي جماعه في واقع الامر غير مهمومه بأي شئ علي الاطلاق غير مصالحها ومصالحها فقط وخير دليل علي ذلك هو تصريح محمد مرسي رئيس حزب الحريه والعداله "بانه لن يستطيع احد افساد عرس الديمقراطيه" ويقصد انتخابات مجلس الشعب ..قالها ودماء شباب مصر الطاهره تسيل علي الارض في احداث محمد محمود !!
ولم اجد في مخيلتي اي وصف لهذه الجماعه غير ابيات احمد شوقي الرائعه لوصف الماكرين المستغلين الدين لمصالحهم :
برز الثعلب يوما .. في ثياب الواعظينا
فمشي في الارض يهدي .. ويسب الماكرينا
ويقول الحمد لله .. اله العالمينا
يا عباد الله توبوا .. فهو كهف التائبينا
وازهدوا في الطير .. ان العيش عيش الزاهدينا
واطلبوا الديك يؤذن .. لصلاة الصبح فينا
فاتي الديك رسولا .. من امام الناسكينا
عرض الامر عليه .. وهو يرجو ان يلينا
فاجاب الديك عذرا .. يا اضل المهتدينا
بلغ الثعلب عني .. عن جدودي الصالحينا
عن ذوي التيجان .. ممن دخل البطن اللعينا
انهم قالوا وخير القول .. قول العارفينا
مخطئ من ظن يوما .. ان للثعلب دينا  
ولكني اتمني من الله ان يستفيق شعب مصر ويتعلموا من هذا الديك الفصيح ويدركوا حقيقة "الثعلب" .. اقصد الجماعه !!

غزوة الصناديق

حدثت في مثل هذا اليوم اكبر اشتغاله في تاريخ مصر الحبيبه حيث توجه ملايين المصريين للادلاء باصواتهم في استفتاء وهمي ضحك به المجلس العسكري علي الشعب طيب القلب وتم تقسيم هذا الشعب المسكين بين فريقين ،فريق نعم وفريق لا،وهب آنذاك ائمة المساجد وشيوخ السلطان يضحكون علي البسطاء والجهلاء والفقراء من الشعب ويصورون لهم ان من قال نعم فقد نصر الاسلام والمسلمين وتمادي بعضهم في تصويرها وكانها غزوه من غزوات الاسلام ويجب علينا الانتصار فيها وان من قال لا فقد عصي الله ورسوله وسوف يحق عليه عذاب جهنم وبئس المصير !!
ودشن المجلس العسكري حربا اعلامية شعواء علي كل مؤيدين "لا" وصور "نعم" وكأنها جنة الله في الارض وانها سوف تجلب الامان والاستقرار وسوف تؤدي الي دوران عجلة الانتاج - اللي احنا بندور عليها بقالنا سنه تقريبا - بسرعة الضوء واقنعوا الناس ان "الاشيه هتبقي معدن " وان الناس هتعيش ملوك بعد "نعم"وبالفعل هب الناس ليصوتوا في الاستفتاء وهم يعتقدون انهم يسخرون من مبارك بعدما خلعوه وانهم يخطون اولي خطواتهم نحو الديمقراطيه التي حددها لهم سلفا المجلس العسكري "مجلس مبارك المخلوع" واستفتي الناس علي ٨ مواد ،وقالت الصناديق للاستفتاء نععععععم وقالت مصر للاشتغالات نعععععععم ايضا،حيث فوجئنا باعلان دستوري من المجلس العسكري يحتوي علي ٦٣ ماده لم يستفتي عليهم الشعب اصلا "يعني كأن بالبلدي المجلس العسكري مضي الشعب علي بياض وحط اللي يعجبه بقي بعد كدا" وحتي بعد مارضينا بالغلب وبال ٦٣ ماده اللي ماستفتيناش عليهم اصلا،الغلب مارضاش بينا وانطلق الخبراء العسكريين في جميع القنوات يروجون لفكرة ان "نعم" التي كانت في الصناديق كانت نعم لشرعية المجلس العسكري !!!
وبعد الحرب النفسيه التي خاضها الشعب بين نعم ولا وبعد استنزافه فكريا ومعنويا وبعد شغل الناس والهائهم بقضيه وهميه اصلا هيا "نعم" ولا " لا" طل علينا اللواء ممدوح شاهين بجملته الخالده وهي :سواء النتيجه كانت نعم او لا كنا برضه هنعمل اعلان دستوري!!!!! هههههههههه واي كلام بقي ولا حد فاهم اي حاجه في اي حاجه
قولنا طب خلاص نستني بقي الاستقرار اللي هيجي بقي طالما خسرنا كل حاجه تانيه!! وحتي دي طلعت اونطه ولا الاستقرار جه ولا الامن اتحقق وحصلت يدوب كام مدبحه علي كام مجزره ومات كام ميت واحد علي كام الف واحد اتصابوا علي ١٢ او ١٣ الف اتحاكموا ظلم في محاكم عسكريه وتم تعرية بنات مصر في الشوارع وانتهاك اعراض بنات ااخريات بكشوف العذريه المشينه !! كل دا حصل بعد ماصوتوا ب "نعم" بتاعة الاستقرار"؟؟ ايوا والله العظيم الكلام دا حصل والله علي ما اقول شهيد ..اومال لو كنتوا صوتوا ب "لا" بتاعة الخراب كان هيحصل ايه"؟؟ كان هيجيلكوا تسونامي زي بتاع اليابان !! يا سيدي الفاضل اليابان اتسوت بالارض واتبنت في شهر واحنا عملنا حتة ثوره وحسسوسنا اننا انضربنا بالنووي ومش هتقوملنا قومه تاني.
الدروس المستفاده من خدعة الاستفتاء :
١- المجلس العسكري لا يقول الحقيقه وهو في الواقع من يقود الثوره المضاده لاجهاض ثورة ٢٥ يناير .
٢-الاخوان والسلفيين يتلاعبون بالدين ويستغلونه لمصالحهم فقط ولا يوجد عندهم اي اعتبارات اخري غير مصالحهم بدليل وجودهم في البرلمان منذ اكتر من شهرين ولم يتم تحقيق اي هدف من اهداف الثوره  التي مكنتهم من مقاعد البرلمان الوثيره ولم نري منهم غير الخضوع للمجلس العسكري واتهام الثوار بالبلطجه وتعاطي المخدرات.
٣-القيادات المسيحيه كلها تقريبا تحذو حذو الاخوان والسلفيين وتستغل مكانتهم عند الناس لتنفيذ اوامر الحاكمين للبلاد.
٤-الشعب انضحك عليه ولسه بينضحك عليه ويتم استنزاف قواه مجددا في سلسلة انتخابات مجلس الشعب المهدد بالحل في اي لحظه بعد صدور حكم من الاداريه العليه بحله وكذلك الانتخابات الرئاسيه التي سوف تزور بفعل الماده ٢٨ الملعونه.
٥-يؤسفني اقولكوا ان احنا ضايعين ضايعين لا محاله ... الا اذا قامت ثوره اخري وحسبنا الله هو نعم المولي ونعم النصير .